Rektorluğun vəzifələri

• Universitetin struktur bölmələrini Elmi Şuranın qəbul etdiyi qərarlara əsasən formalaşdırır;
• Hazırlanan ixtisaslara uyğun olaraq ümumfənn və buraxılış kafedralarını formalaşdırır;
• Normativ sənədlərin icrası üzərində nəzarəti təşkil edir;
• Universitetdə qəbul olunmuş qərarların və verilmiş əmrlərin icrasını təşkil edir;
• Kafedra və dekanlıqlarda tədrisin gedişatını özündə əks etdirən sənədlərin vaxtında və tələb olunan səviyyədə tərtib olunması üzərində nəzarət edir;
• Tədrisin keyfiyyətinin yüksəldilməsi üçün tədbirlərin hazırlanması və icrası üzərində nəzarəti təşkil edir;
• Müvafiq nazirlik, komitə və təşkilatlardan daxil olan tövsiyə və təkliflərin icrasını təşkil edir;
• Vətəndaşların qəbulu və onların ərizə və şikayətlərinə baxır;
• Məzunların işlə təmin olunmasına əməli köməklik göstərir.

Rektorluğun nümayəndələri

• İBAD MUSA OĞLU ABBASOV
  iqtisad elmləri doktoru, professor, Bakı Biznes Universitetinin təsisçisi və rektoru

• AĞASƏLİM KƏRİM OĞLU ƏLƏSGƏROV
  Azərbaycan MEA-nın müxbir üzvü, iqtisad elmləri doktoru, professor, elmi işlər üzrə prorektor

• RAHİM FƏRAHİM OĞLU SADIQOV
  iqtisad elmləri namizədi, dosent, tədris işləri üzrə prorektor

• SABİR ABUZƏR OGLU ƏMİRXANOV
  pedaqoji elmlər namizədi, dosent, tərbiyə işləri üzrə prorektor

• İKRAM KƏRİM OĞLU AĞASİYEV
  tarix elmləri namizədi, dosent, BBU Elmi Şurasının elmi katibi

İBAD MUSA OĞLU ABBASOV
iqtisad elmləri doktoru, professor,
Bakı Biznes Universitetinin təsisçisi və rektoru

İbad Musa oğlu Abbasov 1953-cü ildə müəllim ailəsində anadan olmuşdur. O, 1971-ci ildə Azərbaycan Respublikası Ağcabədi 1 saylı şəhər orta məktəbini bitirdikdən sonra Sovet ordusu sıralarında hərbi xidmətdə olmuşdur. 1974-cü ildə ordu sıralarından tərxis edilmiş və həmin il Azərbaycan Xalq Təsərrüfatı İnstitutunun «Uçot-iqtisad» fakültəsinə daxil olmuş və 1978-ci ildə həmin institutu bitirmişdir. İbad Musa oğlu Abbasov 1978-ci ildən 1993-cü ilədək bir sıra məsul vəzifələrdə çalışmış və sıravi mühasiblikdən baş direktor vəzifəsinədək yüksəlmişdir. 1988-ci ildə Sankt-Peterburq şəhərində namizədlik, 2001-ci ildə isə doktorluq dissertasiyaları müdafiə etmiş və iqtisad elimləri doktoru elmi dərəcəsini almışdır.

İbad Musa oğlu Abbasova 1993-cü ildə elm və təhsildəki nailiyyətlərinə görə «Mühasibat uçotu və audit» ixtisası üzrə professor elmi adı verilmişdir.

Professor İbad Musa oğlu Abbasov bazar iqtisadiyyatı münasibətləri şəraitində iqtisadçı kadr hazırlığına olan tələbatı nəzərə alaraq 1992-ci ildə Bakı Biznes Universitetini təsis etmiş və həmin dövrdən də onun təsisçisi, rektorudur.

İbad Musa oğlu Abbasovun Respublikamızda iqtisad elminin və xüsusilə auditin elmi-praktiki inkişafında xüsusi xidməti vardır. O, bu sahədə ümumilikdə 150 çap vərəqi həcmində elmi əsərlərin , o cümlədən 4 monoqrafiyanın, 4 tədris-metodik vəsaitin və 2 dərsliyin müəllifidir. Onun 35-ə yaxın elmi məqaləsi və əsərləri xarici ölkələrdə nəşr edilmişdir. Respublikamızda və MDB ölkələrində böyük nüfuza malik olan elmi-praktiki «Audit» jurnalının təsisçisi və baş redaktorudur.

İbad Musa oğlu Abbasovun Respublikamızda iqtisadçı kadrların hazırlığında böyuk əməyi vardır. Bu xidmətinə görə o, 1996-cı ildə Yusif Məmmədəliyev adına xüsusi mükafata və 2003-cü ildə Azərbaycan Respublikası Təhsil Nazirliyinin Fəxri Fərmanı ilə təltif edilmişdir. O, eyni zamanda ölkənin içtimai-siyasi həyatında yaxından iştirak edir və Yeni Azərbaycan Partiyasının Yasamal rayon təşkilatının idarə heyətinin üzvüdür.

AĞASƏLİM KƏRİM OĞLU ƏLƏSGƏROV
Azərbaycan MEA-nın müxbir üzvü, iqtisad elmləri doktoru, professor,
elmi işlər üzrə prorektor

Ağasəlim Kərim oğlu Ələsgərov 1928-ci ildə anadan olmuşdur. 1950-ci ildə Azərbaycan Xalq Təsərrüfatı İnstitutunu bitirmiş və Mərkəzi Plan Təşkilatlarında müxtəlif rəhbər vəzifələrdə çalışmışdır. 1953-cü ildə respublikanın direktiv orqanları tərəfindən M.V. Lomonosov adına Moskva Dövlət Universitetində “Siyasi iqtisad”, “Fəlsəfə” və “Tarix” müəllimləri hazırlayan xüsusi məktəbə göndərilmişdir. “Siyasi-iqtisad“ ixtisası üzrə məktəbi müvəffəqiyyətlə bitirdikdən sonra 1954-1955-ci illərdə M. Əzizbəyov adına Azərbaycan Sənaye İnstitutunun “Siyasi-iqtisad“ kafedrasında müəllim işləmiş və 1955-ci ildə SSRİ EA-nın İqtisadiyyat İnstitutunun aspiranturasına daxil olmuşdur. O, 1957-ci ildə namizədlik, 1968-ci ildə doktorluq dissertasiyasını müdafiə etmiş və 1969-cu ildə professor elmi adına layiq görülmüşdür. 1989-cu ildə Azərbaycan Elmlər Akademiyasının müxbir üzvü seçilmişdir.

Ağasəlim Kərim oğlu Ələsgərov respublikanın rəhbərliyi tərəfindən 1974-cü ildə D. Bünyadzadə adına Xalq Təsərrüfatı İnstitutuna elmi işlər üzrə prorektor vəzifəsinə təsdiq edilmiş və 1978-ci ildə direktiv orqanların icazəsi ilə Azərbaycan Elmlər Akademiyasının İqtisadiyyat İnstitutuna müsabiqə yolu ilə şöbə müdiri vəzifəsinə keçmişdir. Onun elmi-təşkilatçılıq fəaliyyətinin əsas hissəsi AMEA-nın İqtisadiyyat İnstitutu ilə bağlıdır. O, 1981-ci ildə həmin İnstitutun direktor müavini, 1989-1999-cu illərdə direktor vəzifəsində çalışmışdır. 1993-cü ildən hazırkı dövrə qədər əvəzçiliklə Bakı Biznes Universitetinin elmi işlər üzrə prorektoru vəzifəsində işləyir.

Professor 320 çap vərəqəsi həcmində 206 elmi əsərin, o cümlədən 20 monoqrafiya, kitabça, dərs və metodik vəsaitin, elmi məqalələrin və tezislərin müəllifidir. Onun elmi əsərləri Rusiya, ABŞ, İngiltərə, Almaniya, Slovakiya, İran, Türkiyə və digər ölkələrdə çap olunmuşdur. Alimin elmi rəhbərliyi ilə 35 namizədlik və 3 doktorluq dissertasiyası müdafiə edilmişdir.

Son 50 ildə o, digər müəlliflər ilə birlikdə elmi-tədqiqat işlərinin nəticələrini 60-dan çox təhriri məruzə, tövsiyə və digər müvafiq təşkilatlara təqdim etmişdir. Ölkənin Milli Məclisində baxılmaq üçün qanun layihələrinin hazırlanmasında yaxından iştirak etmişdir.

Ağasəlim Kərim oğlu Ələsgərovun əmək fəaliyyəti dövlət tərəfindən qiymətləndirilmişdir, bir sıra medal və fəxri fərmanlarla təltif edilmişdir.

RAHİM FƏRAHİM OĞLU SADIQOV
iqtisad elmləri namizədi
dosent, tədris işləri üzrə prorektor

Rahim Fərahim oğlu Sadıqov 1972-ci ildə anadan olmuşdur. 1989-cu ildə Masallı şəhər 1 saylı orta məktəbini bitirmişdir. Rahim Fərahim oğlu Sadıqov həmin ildə Azərbaycan Neft-Kimya İnstitutunda məktəblilər arasında keçirilən ümumrespublika riyaziyyat olimpiadasında I dərəcəli diploma layiq görülmüşdür. O, 1989-cu ildə Leninqrad Maliyyə-İqtisad İnstitutunun Bakı Filialına (indiki Azərbaycan Dövlət İqtisad Universitetinə) daxil olmuşdur və 1994-cü ildə oranı bitirmişdir.

1995-ci ildə Binəqədi rayon Vergilər İdarəsində böyük dövlət vergi müfəttişi vəzifəsinə təyin olunmuşdu. 1999-cu ilə qədər şöbə rəisi vəzifəsində çalışmışdır. 2000-ci ildə Naxçıvan Universitetində tədris hissəsinin müdiri kimi çalışmış, 2002-ci ildə “Firmadaxili planlaşdırmanın formalaşdırılması və təkmilləşdirilməsi məsələləri” mövzusunda namizədlik dissertasiyasını müdafiə etmiş və iqtisad elmləri namizədi alimlik dərəcəsi almışdır. 2003-cü ildən 2006-cı ilədək Bakı Biznes Universitetində dekan müavini və dekan vəzifəsində çalışmış, 2006-cı ildən 2009-cu ilədək Azərbaycan Universitetində tədris hissəsinin müdiri kimi fəaliyyət göstərmişdir. 2009-cu ilin sentyabr ayından etibarən Bakı Biznes Universitetinin tədris işləri üzrə prorektorudur.

Rahim Fərahim oğlu Sadıqov 50 elmi məqalənin, 9 kitabın müəllifidir və doktorluq dissertasiyası üzərində çalışır. Tədqiqat işlərini Rusiya, Türkiyə, Tayland, Malayziya və başqa ölkələrin ali məktəblərində aparmışdır.

SABİR ABUZƏR OGLU ƏMİRXANOV
pedaqoji elmlər namizədi, dosent,
tərbiyə işləri üzrə prorektor,
«Humanitar fənlər» kafedrasının müdiri

Sabir Abuzər oglu Əmirxanov 1949-cu ildə anadan olmuşdur. 1975-ci ildə Azərbaycan Dövlət İncəsənət İnstitutunun «Mədəni-maarif işi» fakültəsini bitirmişdir. 1976-1979-cu illərdə Respublika Mədəniyyət Nazirliyinin «Mədəni-maarif işləri» idarəsində baş metodisti, 1980-1990-cı illərdə Azərbaycan Dövlət İncəsənət İnstitutunda müəllim, 1990-1998-ci illərdə isə həmin institutda tədris hissə müdiri, «Sənətşünaslıq» fakültəsinin dekan müavini vəzifələrində çalışmışdır. 1999-cu ildən Bakı Biznes Universitetində tərbiyə işləri üzrə prorektor və «Humanitar fənlər» kafedrasının müdiri vəzifələrində çalışır.

1997-ci ildə namizədlik dissertasiyasını müdafiə etmiş və pedaqoji elmlər namizədi alimlik dərəcəsi almışdır.

Sabir Abuzər oglu Əmirxanov 90-dan çox elmi əsərin, o cümlədən 7 dərslik və dərs vəsaiti, 6 monoqrafiyanın, 16 tədris proqramının, 16 tədris-metodik vəsaitin və tövsiyələrin, 90-dan artıq məqalə və tezislərin müəllifidir. Ümumiyyətlə, onun 170 çap vərəqindən artıq elmi əsərləri nəşr olunmuşdur. 2002-ci ildə ali məktəblər üçün nəşr edilmiş «Muzeyşünaslıq», 2004-cü ildə isə «Tətbiqi kulturologiya», 2008-ci ildə «Dünya muzeyləri və tarixi mədəniyyət abidələri» dərsliklərinin müəlliflərindən biridir. Hazırda doktorluq dissertasiyası tamamlanmaq üzrədir.

2001-ci ildən Yeni Azərbaycan Partiyası Yasamal rayon təşkilatı H. Zərdabi 88a (BBU) ərazi ilk partiya təşkilatının sədridir..

İKRAM KƏRİM OĞLU AĞASİYEV
tarix elmləri namizədi, dosent,
BBU Elmi Şurasının elmi katibi

İkram Kərim oğlu Ağasiyev 1963-cü ildə anadan olmuşdur. 1988-ci ildə Volin Dövlət Universitetinin (Ukrayna Respublikası) «Tarix» fakültəsini fərqlənmə diplomu ilə bitirmiş, 1988-1992-ci illərdə Volin Tarix Muzeyində baş elmi işçi vəzifəsində işləmişdir. 1992-1995-ci illərdə Volin Dövlət Universitetinin aspirantı olmuşdur. Aspiranturanı müvəffəqiyyətlə başa vurduqdan sonra Krasnoyarsk Dövlət Pedaqoji Universitetində işləmiş, 1999-cu ildə namizədlik dissertasiyasını müdafiə etmişdir və tarix elmləri namizədi alimlik dərəcəsinə layiq görülmüşdür.

2003-cü ilin əvvəllərində daimi olaraq Azərbaycana qayıdan İkram Kərim oğlu Ağasiyev AMEA-nın Tarix İnstitutunda böyük elmi işçi vəzifəsində işləmiş və 2003-cü ilin sentyabrından Bakı Biznes Universitetinin «Humanitar fənlər» kafedrasında dosent vəzifəsində çalışır. Bununla yanaşı o, Universitetin Elmi katibi vəzifəsini də yerinə yetirir.

İkram Kərim oğlu Ağasiyev pedaqoji fəaliyyətlə yanaşı geniş elmi fəaliyyətini də davam etdirir. 1989-cu ildən postsovet məkanında mövcud olmuş alman koloniyalarının tarixini tədqiq edən gənc alim bu günə qədər alman əhalisinin tarixinə həsr olunmuş 30 elmi işin müəllifidir ki, onların ümumi həcmi 40 çap vərəqidir. Elmi əsərlərinin əksəriyyəti xaricdə - Ukraynada, Rusiyada çap olunmuşdur və bu əsərlər həm Rusiya, həm də Cənubi Qafqaz almanlarının tarixinə həsr edilmişdir.

Hazırda tədqiqatçı doktorluq dissertasiyası üzərində çalışır.