Bakı Biznes Universitetinin “Humanitar elmlər” kafedrası və Əmək Bazarı və Sosial Müdafiə Məsələləri üzrə Milli Observatoriyanın birgə təşkilatçılığı ilə elmi seminar keçirilmişdir

27 noyabr 2025-ci il tarixində Bakı Biznes Universitetinin “Humanitar elmlər” kafedrası və Əmək Bazarı və Sosial Müdafiə Məsələləri üzrə Milli Observatoriyanın birgə təşkilatçılığı ilə elmi seminar keçirilmişdir. Seminarın təşkilində məqsəd əmək bazarındakı aktual dəyişikliklərin elmi analizini aparmaq, sosial müdafiə sahəsində müasir yanaşmaları müzakirə etmək və ali təhsil müəssisəsi ilə müvafiq dövlət qurumu arasında elmi-praktik əməkdaşlığı gücləndirmək olmuşdur.

Tədbiri giriş sözü ilə Humanitar elmlər kafedrasının müdiri, f.ü.f.d., dosent Məhsəti Cəfərova açaraq əməkdaşlığın əhəmiyyətindən, tələbələrin bu cür elmi-praktik görüşlərdə iştirakının onların peşəkar inkişafına verdiyi töhfədən bəhs etmişdir. O, əmək bazarı və sosial müdafiə sahəsində aparılan tədqiqatların humanitar elmlərlə inteqrasiyasının vacibliyini vurğulamışdır.

Daha sonra “Humanitar elmlər” kafedrasının müəllimi s.ü.f.d. Tutu Eyvazova “Sosial işin təşkil olunmasında yumşaq bacarıqların rolunun təhlili” mövzusunda çıxış edərək sosial işçilərin peşəkar fəaliyyətində kommunikasiya, empatiya, komanda işi və liderlik kimi yumşaq bacarıqların əhəmiyyətini elmi əsaslarla təhlil etmişdir. Sosial Xidmətlər Agentliyinin Valideyn himayəsindən məhrum olmuş uşaqlarla iş departamentinin müdiri Şahmalıyev Cavid İmam oğlu dövlət uşaq siyasəti, alternativ qayğı formaları və həssas qruplarla iş mexanizmləri barədə məlumat vermiş, sahədə mövcud çağırışları və tətbiq olunan yeni yanaşmaları seminar iştirakçılarının diqqətinə çatdırmışdır. “Humanitar elmlər” kafedrasının müəllimi Gülşən Axundova “Şəxsiyyətin sosial inkişafı və deviant davranışın profilaktikası” mövzusunda məruzə ilə çıxış edərək gənclər arasında sosiallaşma prosesləri, risk qruplarının formalaşma səbəbləri və deviant davranışın qarşısının alınması istiqamətində profilaktik tədbirləri izah etmişdir. Seminar çərçivəsində əməkdaşlığın gələcək istiqamətləri, birgə elmi layihələrin təşkili, tələbələrin sosial müdafiə sahəsində praktiki bilik və bacarıqlarının artırılması kimi məsələlər ətrafında fikir mübadiləsi aparılmışdır. Tədbirin sonunda iştirakçılar mövzular ətrafında sual-cavab və müzakirələrdə fəal iştirak etmiş, seminarın elmi və praktiki baxımdan faydalı olduğu vurğulanmışdır.