BBU magistrantları Elm və Təhsil Nazirliyinin İqtisadiyyat İnstitutunda elmi-tədqiqat təcrübəsinə başlayıblar

Elm və Təhsil Nazirliyinin İqtisadiyyat İnstitutunda Bakı Biznes Universitetinin (BBU) magistrantları üçün elmi-tədqiqat təcrübəsinə start verilib. Noyabrın 12-dən dekabrın 9-dək keçirilən təlimlərdə BBU-nun II kurs üzrə təhsil alan 10 magistrantı iştirak edir.

Təcrübənin yüksək səviyyədə təşkili məqsədilə i.f.d., dosent Tariyel Qurbanov magistrantların elmi-tədqiqat təcrübəsinin rəhbəri təyin olunub. İqtisadiyyat İnstitutunda təcrübə proqramına qoşulan magistrantlarla görüş keçirilib. Görüşdə BBU-nun Magistratura və Doktorantura Mərkəzinin rəhbəri İsmayıl Şərifli, eləcə də Universitet–Sənaye Əməkdaşlığı və Məzunlarla İş Mərkəzinin direktoru, i.ü.f.d. Qafar Bağırov iştirak ediblər.

Təlimlərin keçirilməsi Bakı Biznes Universiteti ilə İqtisadiyyat İnstitutu arasında imzalanmış əməkdaşlıq müqaviləsinə əsaslanır. Müqaviləyə uyğun olaraq, ödənişli əsaslarla təşkil olunan bu kurslar Azərbaycanda özəl universitetlə elmi institut arasında ixtisas yönümlü təlimlərin təşkili baxımından diqqətçəkən və innovativ təcrübə hesab olunur. Təcrübə müddətində magistrantlar üçün elmi-tədqiqat yönümlü məşğələlər və praktiki dərslər İqtisadiyyat İnstitutunun aparıcı alimləri tərəfindən keçirilir.

Proqram çərçivəsində magistrantlar institutda aparılan fundamental elmi-tədqiqat işləri ilə yaxından tanış olmaq imkanı əldə edirlər. Təcrübə başa çatdıqdan sonra iştirakçılara İqtisadiyyat İnstitutunun sertifikatlarının təqdim edilməsi nəzərdə tutulur.